انا اللي قتلت الدباديب

في يوم من الأيام اكتشفت ان دباديبي حبايبي، يعني الدبدوب الأبيض والأرنوب الروز والكلبوب الكبير وكل اخواتهم التانيين في حاله سيئه جدا، يعني محتاجين تنظيف فورا!!!
وبسرعه، خطرت لي فكره عبقريه، الدباديب دي لازم تدخل الغساله! وبسرعه ومع نص علبه الصابون وكميه محترمه من الكلوروكس دخلت دباديبي الغساله، وعلى البرنامج المغلي واديها!!!
وفضلت الوقت كله اتخيل حلاوتهم وجمالهم لما يخرجوا من الغساله اخر نظافه واعرف وقتها اخدهم في حضني تاني وانام وسطهم على سريري.....
وطالت فتره وجودهم في الغساله، البرنامج المغلي بيفضل اكتر من ساعتين!! وقررت اقعد عند باب الغساله علشان اطمئن عليهم،،، وحسيت انهم في حاله من الإستمتاع الكامل بالحمام الكامل والمعقم اللي هم فيه!! وضحكت من قلبي على شكلهم وهم بيتقلبوا في الغساله يمين وشمال والصابون حواليهم... مره دبدوبي حبيبي راسه تحت ورجليه فوق، ومره ارنوبي الروز ودانه طالعه لفوق ومره نازله لتحت، ومره الكلبوب الكبير في وسطهم، ومره فوقهم ومره تحتهم...
وفضلت في غرفه المشاهده فتره طويله، حتى شعرت بالملل... واضطريت اودعهم بشكل مؤقت واترك المكان ووقتها سمعت صوت ماما بتقوللي "هو ايه اللي في الغساله كل ده؟؟" قلت لها بمنتهى البرأه، "دول دباديبي" قالت لي كل ده؟؟ دول في الغساله من اكتر من ساعه!!؟؟ على العموم.. ربنا يستر!!
وبعد فتره طويله، وبعد الشطف والعصر واللذي منه، انهت الغساله دورتها ووقف موتورها عن العمل، الموتور المسكين، كان صعبان عليا من طول فتره دورانه!!!!! ورحت بسرعه افتح الباب علشان استقبل اولادي حبايبي.........
وكأني فتحت باب سفينه فضاء!!!!!!!!! خرج عليا من باب سفينه الفضاء .. قصدي الغساله... كائنات خرافيه اراها لأول مره في حياتي!!! صحيح ان اشكالها مستوحاه من شكل دباديبي لكنها تختلف عنها في نواحي جوهريه جدا!...... فهذا يشيه الى حد كبير دبدوبي الأبيض لكن هذا بدون اذرع،، وله عين واحده.... وهذا يشبه ارنوبي الروز لكن بأذن واحده ولونه قريب من اللون الرمادي وليس له ارجل على الإطلاق!!!.. وهذا شبه كلبوبي الجميل لكن بدون اعين ولا ذيل......وهكذا.......وطبعا اشترك الجميع في شكل فراء واحد حيث تكور فراؤهم حول نفسه مكونا جدائل عجيبه الشكل تتدلى على اجسادهم –او على المتبقى من اجسادهم- .وهكذا، فقد تحول كل دبدوب من دباديبي حبايبي الى كائن فضائي خنفشاري عجيب لم يظهر حتى من قبل في افلام الكارتون ولا افلام الخيال العلمي ....
واختلط على الأمر تماما، هل هذا المنظر يؤدي الى الضحك ام الى البكاء، فالدهشه لخبطت جهازي العصبي وقطعت الإتصال تماما بين اشارات المخ وباقي اعضاء الجسم!!!
بعد عده ثواني، بدأت اتنبه للأمر ولما فعلته بيدي في احبائي!!! واقترحت علي امي ان انشرهم على الحبال في الشمس لفتره حتى يجفوا ، فقد تحدث معجزه ويعود شكل فراؤهم على الأقل الى ما كان عليه قبل الحادث الأليم....
وقد كان، وظللت اتأمل منظرهم المؤلم وهم معلقون بما تبقى من اجسادهم على الحبال على منشر الغسيل...
وبعد جفافهم،،، وبعد ان ادركت انه لا فرق يذكر بين ما كانوا عليه وهم مبللين وما اصبحوا عليه بعد جفافهم فقد اصبحت كائناتي الخرافيه هي الدليل انني الوحيده التي تمكنت من عكس القصه والمقوله الشهيره "الدبه التي قتلت صاحبها" فبعبقرية فذه قتلت دباديبي كلهم او بمعنى اصح، سخطهم لحيوانات فضائيه!!!!!!!!!لكن معلش،، هم دلوقتي نظاف وزي الفل!!!

(شكرا لدينا عبد الرحمن على الكاركاتير الرهيب ده)

اكيد بتهزري.................

وحشتيني، وفي سؤال عايزه اسألهولك من شهور طويله!!!! هو انتي مشيتي بجد ولا بتهزري ؟ ما انتي عملتيها كتير!! بتعرفي تأدي الدور بجداره لغايه مانصدق انه بجد!!!
كام مره اقنعتيني ان كل الشيكولاته اللي باحبها خلصت، ولما افقد الأمل واضطر احترم نفسي واكمل النظام الغذائي بتاعي تيجي في اليوم المفتوح اللي ممكن اكل فيه كل حاجه وتعملي لي مفاجئه، ما انتي كنتي شايله كل الشيكولاته علشان خاطري!!!مش كنتي بتعملي نايمه لغايه ما اجي واتدفي في السرير جنبك وفجأه تبدأي تكلميني!!!! وتقولي لي انك صاحيه من الأول بس كنتي بتهزري معايا!!!!
مش القطط فصلوا سلك التليفون وفضلت اتصل ومفيش اي رد من ناحيتك، واتفزعت، ونزلت من الشغل اجري علشان اطمن عليكي،،، يومها كان قلبي هايقف من الرعب، وطول الطريق وانا باسأل نفسي، هو ممكن يكون للدنيا اي شكل من غير وجودك فيها؟ ازاي ممكن يكون في نورللشمس وانتي مش موجوده، وازاي يكون في احساس بالشوارع والبيوت والمحلات ، ولا حتى ملامح للوشوش!!!
فعلا كان قلبي هايقف وانا بافتح الباب بالمفتاح، كأن حياتي كلها مرهونه بالصوره اللي هاشوفها لما الباب يتفتح...وفي خلال الثواني دي، ظهرت كل الأفكار السوده وعاشت جوه دماغي!!! ولما دخلت البيت ولقيتك نايمه ولما قربت منك علشان اشوفك نايمه ولا.........!!!!!!!! فتحتي عينيكي وقلتي لي "ايه اللي جابك دلوقتي؟ مالك؟ انتي تعبانه؟ حصل حاجه في الشغل؟ " حسيت وقتها ان روحي رجعت مكانها في جسمي!! وفي اقل من ثواني حسيت ان الدنيا نهار فعلا، وشفت الشمس طالعه بالرغم اني جوه البيت ،، ودخلت بسرعه اعمل لك فطار، ما انا كنت نزلت من غير ما احضر لك فطارك النهارده!!! انا اسفه، مش عارفه عملت كده ازاي، ومش عارفه ازاي كنت بارفض لك طلب ولا كان ممكن احسسك اني تعبانه من خدمتك!!
بعد الموقف ده ما عدى،، وبعد ما اطمنت عليكي، افتكرت ان كل موقف زي ده ممكن يعدي بسلام... مش قلت لك انتي بتهزري،،،!!!!! قولي لي ان الموقف التاني عدى هو كمان بسلام!!!
تعرفي نفسي في ايه؟ بلاش اقولك علشان ما تزعليش،،،ما انا عارفه ان الحاجه الوحيده اللي كانت بتزعلك، وساعات كتير بترفع عندك الضغط والسكر انك تحسي اني باحلم بحاجه وانتي مش قادره تحققي لي حلمي!
ربنا يسامحك، عودتيني ان احلامي اوامر! دلوقتي بقيت اخاف احلم، ده الحلم عبئ وتحقيقه مشوار وجهد....
بصي، بتهزري ولا بتتكلمي جد، مش هايفرق كتير،، ما انتي كده او كده مش موجوده معايا! اقولك على سر، انا كويسه دولقتي، كنت تعبانه جدا لكن بعد شويه وبعد ما دعواتك بعتت لي ناس كتير تقف جنبي، خلاص، بقيت كويسه!! هاغير شغلي، معروض عليا شغل تاني بمرتب كبير!! ده انا بقيت مديره... وممكن كمان قريب اوي اجيب عربيه حلوه،، على الزيرو، مش انتي قلتي اني لازم اجيب عربيه على الزيرو؟!! حاضر ياستي، بس انتي تأمري!.بس كان نفسي تركيبها معايا........... فاكره؟ فاكره فسحنا مع بعض ومغامراتنا وانا لسه باتعلم السواقه؟ على فكره، انتي جيتي على نفسك واستحملتيني كتير لغايه ما بقيت سواقه محترفه.......
وعلشان تطمني كمان، انا بدأت اخلي بالي من نفسي، واحبها زي ما بابا كان بيقوللي..... مش باب دايما كان يقوللي حبي نفسك شويه، واهتمي بيها!!!!!!!!! قولي له ان بنتك سمعت الكلام،،،بتروح الجيم وبتخرج وبتتفسح وبتشوف الناس!! مش كده كويس؟
اه صحيح!!!! انتي عامله ايه مع بابا؟؟؟ لسه بتناقروا مع بعض؟ لسه الحوار بينكم يهلك من الضحك؟
ضحك............... ضحك............ قولي لي صحيح، يعني ايه كلمة ضحك دي؟؟ حاسه اني فاكراها، لكن مش عارفه افتكر كانت ازاي!!! ولا بتحصل فين وليه؟!! مش تحاولي تساعديني وتفكريني بمعنى الكلمه دي!! ولا اقولك، تقدري تعلميني معناها وازاي ممكن امارسها واحس بيها وانا لوحدي من غيرك!! انا زعلانه منك جدا، فعلا زعلانه، انتي نسيتي تشرحي الدرس ده ونسيتي تفهميني ازي ممكن اضحك وانتي بعيد عني!!! ازاي ممكن اعيش حياه عاديه انتي مش جزء منها!!!!! ازاي اليوم ممكن يعدي من غير ما اتكلم معاكي واحكي لك على كل حاجه حصلت في اليوم ده بالتفصيل!!!!! للأسف، الدرس اللي ضاع من منهج حياتي مفيش مدرس تاني ينفع يشرحه غيرك علشان كده هافضل مش فاهمه حاجه لغايه ما اجيلك !!
على فكره، رمضان قرب.... كل سنه وانتي طيبه..... قولي لبابا كمان... كل سنه وهو طيب.... وحشوتني.......كل يوم اسأل نفسي نفس السؤال "ممكن يكون في رمضان وعيد وحياه عاديه وانا بعيد عنكم؟؟"

باربي ومصباح علاء الدين

باربي هنا ليست العروسه الشهيرة التي كانت اميره لقلوبنا كأطفال والتي تسببت في خراب ميزانيه اهل اي طفله رخمه من النوع اللي كان ممكن تفضل تزن بالإسبوع علشان بابا يشتريلها باربي وهدوم باربي، وبيت وعربيه باربي، وفي بعض الأحيان اصحابها باربي كمان!!!!!
باربي بتاعتنا دي عبارة عن شخصيه حقيقة من لحم ودم،لكن لديها بعض القدرات الخاصة التي قد يحسدها عليها الأخرين.
انتشرت بسرعة رهيبة اشاعة عن قرب وصول موظفة جديدة الى شركتنا ذات الطابع الخاص في القطاع الشهير بقوته وتميزه وسط قطاعات العمل الأخرى في الدوله... وانتشرت اشاعة اكبر تفيد ان هذه الموظفه ستأتي من باب "تخليص الحق" حيث ان زوجها صاحب منصب كبير وهو الذي سينقذ رئيس الشركه من كارثه محققه لو لم يتمكن احد اصحاب المناصب الرفيعه من انقاذه...
ظهرت هذه الموظفه، فارهه الطول، تتحلى بحلي ذهبيه لا ادري كيف تتمكن من حملها على رقبتها وفي كلتا يديها، وعلى وجهها العديد من الطبقات من المساحيق على كل الألوان ويسبقها كلما حلت ونزلت رائحه بارفان تكفي لإصابتك بحاله من الدوار.

ظهرت باربي بإبتسامه ودوده تحاول التقرب منا، وبدأت في سرد قصتها حيث صرحت بأنها لم تخرج ابدا للعمل بالرغم من مرور 8 سنوات على تخرجها !! واوضحت انه علينا ان نلتمس لها العذر في عدم معرفتها بأي من قواعد ولاقوانين العمل ووفي عدم قدرتها على استخدام الكمبيوتر ولا استخدام اي من الأدوات المكتبيه، وكذلك بدون اي توضيح منها ظهر انها ليست على علاقه من قريب او بعيد بالقدره على استخدم اللغه الإنجليزية (بالرغم من ان كل معاملات الشركه تتم بهذه اللغه) و واوضحت انه علينا ان نتعاون معها ونكون لها سندا فنساعدها على التعلم...وابتسمت ابتسامه لها معنى، تكاد تقول بها "هاتعلموني وإلالالالالالالالا.. انتوا حرين بقى!!!!!
بعد عده شهور، وبما ان شركتنا كانت ذات طبيعه خاصه، فقد اصابها الدور طبعا وحصلت على فرصتها العظيمه في ان تكون شركه من الشركات التابعه للحكومه المصريه،، واتسخطت الشركه لكائن خرافي عديم الشكل وتغير رئيس الشركه الطيب ،وظهر في الأفق رئيس اخر من اصحاب الخبرات الخاصه في اللعب بكل البيض وكل الحجاره ومناسب تماما لطبيعه الجديده للشركه !! ووجد هذا الرئيس الجديد في باربي ضالته المنشوده، ووجدت فيه باربي خادم مصباح علا الدين، ولم تتردد لحظه ودعكت المصباح فظهر لها يقول شبيكي لبيكي الحاج ابو حماده رئيس الشركه الجديد بين ايديكي!!! بس انتي فتحي مخك شويه، انتي مديرة مكتبي ومديرة حياتي كلها، انا مش ناقص حد يقولي ينفع وماينفعش .. وفعلا استوعبت باربي الدرس بسرعه وطلبت من عفريت المصباح اول طلب وهو انها بالرغم من حبها الشديد للوجود بجانبه الا انها تريد ايضا ان تكون محاسبه... والنبي يا ابو حماده بيه نفسي ابقى محاسبه...في لمح البصر اخترع رئيس الشركه الوظيفه المناسبه، واصبحت باربي الموظف ابو روحين! محاسبه، ومساعد ه مديره مكتب رئيس الشركه لما يعوزها في نفس الوقت!!!
بعد عده اسابيع!!!! لا، حرام كده با ابو حماده بيه، كده مش كويس، مش قادره، الشغل كتير وبيقولوا لي اعمل ايه ما اعملش ايه،،، وبيتحكموا فيا،،، اووووف، انا زهقت انا مش عايزه الشغلانه دي!!!
دعكت المصباح مره تانيه،،، وبسرعه جدا اصبحت برضه مساعد مديره مكتب العفريت – قصدي رئيس الشركه- لما يعوزها واخصائي مشتريات... كده بقى حلو اوي،،، جنبك يا ريس وبراحتي محدش يقوللي بتخلصي شغل ايه ومش على مكتبك ليه!!!
وبما انهما من فصيله واحده، وبما انهما من جانب واحد من جوانب الحدوته، فقد كانت مديره مكتب رئيس الشركه الأصليه، بنت الناس صاحبه ال20 سنه خبره نغمه نشاذ في اوركسترا الفساد التي يتم عزفها يوميا على روح المروحومه شركتنا، وعلى ذلك فكان من الواجبات المقدسة للثنائي المدهش ان يقوموا بمساعدتها واعطائها اول دفعه للأمام في طريقها الوظيفي...... وكانت الدفعه قويه بحيث اخرجتها خارج باب الشركة بحيث ستقر في شركه اخرى بعيده بدعوى محاوله ايجاد فرصه لترقيتها الى منصب اعلى في هذه الشركه الأخرى!!!!! والله كتير خيرهم، وزاد وغطى!!
واصبحت باربي المدير الوحيد والرسمي لمكتب السيد عفريت المصباح ، وكان من نصيبها عند دعك المصباح للمره الثالثه هو التعيين النهائي في الشركه والذي حصلت عليه بعد اقل من سنه في حين ان الكثيرين من اصحاب الكفاءات النادره ينتظرون سنوات طويله للحصول على هذه الفرصه!!!
وبعد شهور قليله تم ترقيه عفريتنا من عفريت عادي الى عفريت سوبر فقد تولى منصب مساعد احد الهيئات الكبرى في القطاع الميمون... وبالطبع فلا يمكن للثنائي ان ينفصل،،، فقد تم نقل باربي الى تلك الهئية الراقيه، ومن هنا ظهرت المعجزات!!!! فقد استنسخت السنتان وتحولتا بقدره سحرية لا يقدر عليها سوى عفريت ابن عفريت الى 10 سنوات بالتمام والكمال، وتحول الجهل المطبق الى خبرات ذات طبيعه خاصه واستخدمت هي كل قدراتها الخاصه في الوصول الى ما تحلم به من سلطه (غير رسميه) ونفوذ (خفي)...وليه لأ، فقد اوفى كل منهم بوعده.... فهي تنتظر على باب الحمام عسى ان ينادي عليها من الداخل بصوت عالي قائلا "باربي......... انا خلصت" فتجري نحوه لتساعده......
وهو في نفس الوقت يقوم بحركاته العفريتيه ليحول كل القوانين عن مجراها ويسخرها في خدمه باربي الشاطره الحلوه..
وكشهاده حق، فقد كان عفريتنا من الوفاء بحيث انه عندما شعر بأن رائحته بدأت تفوح وانه قد يأتي اسمه مع بعض من تم القبض عليهم في بعض قضايا الرشوه في القطاع المهيب، قام فورا بإرسالها مره اخرى للمأسوف على شبابها شركتنا المصون ومعها سنوات خبرتها الإثنى عشر والتي تمكنها بسهوله من رأسه العديد من الناس الذين كانوا من سنتين فقط يشرحون لها الفرق بين "الماوس" والكي بورد" وعلى اي زر يمكنها ان تضغط لكي تطبع مانجحت في كتابته واي من الأزرار يجب ان تتلافي لكي لا ينفجر الجهاز في وجهها!!!
واصبحت بدون منافس، صاحبه كرامات لا حصر لها ولا عدد،،، فمن ابسط كراماتها انها عندما عادت لمكتبها في شركتنا الطيبه تم اعاده دهان جدران الإداره بالكامل في يوم واحد، فهي باربي جيرل التي لن تتحمل تواجدها في مكان تحمل جدرانه دهانات مضى عليها اكثر من عام!!! فهذا ضد مظهرها الإجتماعي والوظيفي...
واذكر من ضمن كراماتها انها تمكنت من ان تكون عضوا في احد اللجان لتقييم احد المناقصات الكبرى ( الكبرى جدا والله) ،،،وطبعا ضربت اخماس في اسداس, وغرقت وسط الورق، وبعد طول توهان في طول الورق وعرضه ما كان منها الا ان اقترحت علي المسئولين الفنيين في التقييم وبمنتهي الدلال والدلع،،، "هي ايه يعني لزمه كل المتورات والمولدات دي،،، الغوها الغوها،، بلاش وجع دماغ" فما كان من المهندس المسئول الا ان قال لها، "والله نلغيها علشان خاطر عيونك، ولا تشيلي اي هم" ...
ومن عبد مأمور لاخر، ومن شبيك لبيك، لعبدك بين ايديك، تولت باربي الحكم...
واصبحت نائب لمدير ادارتنا.... واصبح من فرط خوفه على منصبه يعاملها معامله الاميرات،،، فبالرغم من إحاله العفريت الكبير على المعاش الا انه ذو نفوذ وسلطه كبيره في نفس القطاع الموكوس،،،، فقد شارك الكثيرين من اصحاب النفوذ وتولى مناصب استشاريه كبرى مما جعل منه حامي الإستثمار والمتحدث بإسمه لدى قطاعنا العجيب!!
وعليه، فقد اصبحت الأميره باربي صاحبه العرش والصولجان داخل ادارتنا!!!
وظهر نبوغها وفرط ذكائها، فهي كالتلميذ الذكي الذي بدلا من اني يستخدم ذكاؤه في المذاكره، فهو يستخدمه اخر يومين قبل الإمتحان في عمل براشيم وتحضير طرق شيطانيه للغش...
فهذه هي الأميره باربي، كانت تتفنن في استغلال الأخرين لينجزوا لها الأعمال المطلوبه منها وعند تمام انجازها تقوم هي بتقديمها وعلى وجهها ابتسامه الفاتحين....
وبالطبع عندما واجهنا مديرنا بالأمر عمل عملية تجميل للإستغلال والإستهبال وغير شكلهم وسماهم "حسن استخدام للأدوات المتاحه" !!!!
وبقينا احنا على اخر الزمن الأدوات المتاحه!!!! ده احنا بقينا ادوات تساعد الست على البجاحه وعلى اظهار نفسها بمظهر نائب المدير الذكي الألمعي اللوذعي!!!
ومن وقتها اصبح لنا نداء ، نكرره بشكل هستيري على مدار اليوم وهو "هانموت مِنْفِجرين" على رأي محمد هنيدي في فيلم فول الصين العظيم...
فيدخل كل واحد مكتبه ويصيح " هانموت مِنْفِجرين " ويخرج كل واحد من الإراده ويتمتم " هانموت مِنْفِجرين " وينتهي يوم العمل ونخرج من الشركه بسرعه بدل ما " نموت مِنْفِجرين "
وبمرور الوقت،،، شعرت باربي بالملل من دور الأميره واحست انه ان الأوان لتكون الملكة المتوجه على عرش المكان !! ايه المشكله يعني، ماهو المدير ممكن هو كمان ياخد الدفعه المعروفه للأمام، ويخلو الطريق للكرسي!
وهنا فقط، بدأ الشعور بالخطر.... وخاف صاحب الكرسي على الكرسي وحس انه هايتحرم من الشاشه ال ال سي دي واللاب توب،... وبدأت تظهر عليه علامات الرعب والفزع واصابه الهم وارتفع ضغطه لاخر مؤشر جهاز الضغط. وبصراحه صعب علينا حاله، واصبحنا متأكدين انه هايكون اول المنفجرين في المكان.
لكن بعد شهرين تلاته، ربنا استجاب دعواتنا اللي دعينها ليل ونهار، ، وبدل ما نموت كلنا منفجرين... ارسل الله لنا النجده من عنده،،،، فقد تولانا الله برحمته اذا قام العفريت الرهيب بتولي منصب مهيب،،، واحتاج ان تكون باربي العظيمه بجانبه... وعليه،، فقد استخدم كل سلطاته لكي يوفر لها كل الظروف الغير ممكنه سواء نظريا او عمليا،، فجعل منها موظفه حكومة وقطاع خاص في نفس الوقت،،، فلا تخسر مميزات الحكومه ولا يفوتها كنز القطاع الخاص!!!!! وجعل منها مدير لمكتبه وصاحبه مركز اخر مرموق ، فلا يفوتها ان تكون بجانبة طول الوقت بتاخد من الحب ليس مجرد جانب، بل تأخد كل الجوانب، وفي نفس الوقت لا يفوتها قطار الترقيات والمراكز المرموقه في القطاع المبارك!!!!
وتحققت النبؤاه...فقد انفجرنا فعلا وتفتتنا وذهب كل واحد منا في اتجاه.........فقد كرهنا المكان الميمون، والقطاع المهيب وكرهنا اليوم اللي ظهرت فيه الحكومة كشريك في شركتنا وحلفنا مليون يمين ان اليوم ده هو اليوم اللي انطلقت فيه كل الشياطين اللي كانت محبوسه واصبحت الشركه ساحه واسعه من ساحات اللعب العفاريتي اللي عمرنا ما شفناه قبل كده غير في عهد نبلاء الحكومه (السيد العنقباوي، والسيد المهندس الزفلطاوي بيه، والسيد الدكتور المهندس الكعبلاوي باشا، وغيرهم من اصحاب الألقاب التي لا تتسع لها صفحات مجلد كامل) ، وانتشرت باربي تنشر مواهبها بالتساوي على شركات القطاع وذلك طبقا لمبدأ تكافؤ الفرص، فليس من العدل ان يحرم باقي موظفي القطاع من مشاركتنا متعه الموت مِنْفِجرين....
وطبعا خيالي مشي وسابني كالعاده، ووصل لأن يصور لي باربي وقد دعكت الفانوس في يوم من الأيام واخرجت عفريتها لكي يحقق لها حلم مفيش حد في مصر ماحلمش بيه ، لكن في نفس الوقت مفيش حد في مصر قدر يوصل للعفريت اللي يحقق له الحلم ده..... !!!!!!!! بس على مين، دي باربي والاجر على الله...وعفريتها مش اي عفريت..............ويتحقق حلم باربي، و يأتي اليوم الذي نراها فيه تتولى حكم البلاد............. ويتحول وقتها السلام الوطني من بلادي بلادي بلادي لكي حبي وفؤادي الى باربي جيرل ان ذا باربي ورلد........... مش فكره نميسه برضه،،يعني برضه الموضوع مش كله ضلمه،، ده وقتها هاتبقى باربي وعفريتها نجحوا في تحقيق اللي بنحاول نحققه من 30 سنه.........فكره، مش كده!!!

كارت شحن ودكتور حواجب يا ولاد الحلال

- الو، أنا ....... مدام ........إديتني تليفونك علشان موضوع العريس,، انا العريس...
- اهلا وسهلا، انا ......... معاك..
- ايه ده، يعني انتي العروسه شخصيا؟
- ايوه..
- طيب باقولك ايه، انتي عندك تليفون ارضي ينفع اكلمك عليه؟
- لا، للأسف انا مش في البيت دلوقتي..
- طيب قولي لي، مدام .............. قالت لي انك طويله وبيضا وحلوه، هو الكلام ده بجد؟
- والله الحمد لله، انا طويله، لكن ولا بيضه ولا حاجه، أظن شكلي عادي والحمد لله..
- شكلك عادي ولا شكلك حلو،، تفرق كتير!!!؟؟ يعني انا مثلا اقدر اقول على نفسي، طويل، وابيض، ووسيم وشكلي امور....
- والله كل واحد يقول اللي عايز يقوله، اللي اعرفه عن نفسي اني والحمد لله مقبوله الشكل.، كل عيبي اني مليت شويه السنتين اللي فاتوا، وده امر سهل، باحاول اظبطه دلوقتي، ومش هاياخد مني شهر بالكتير.
- ايه ده، يعني وزنك كام يعني؟؟
- يعني، بقى كتير شويه، لكن ربنا يسهل ان شاء الله وابقى عاديه تاني في اقرب وقت..
- باقولك ايه، انا عندي ...... سنه، بأشتغل.....، مطلق,وعندي طفلين ، ممكن تكلميني شويه عن نفسك؟
- انا دلوقتي في الشارع، مش هاعرف اتكلم،،، ممكن شويه ونتكلم تاني لو سمحت!!
- طيب، باقولك ايه، انا معنديش رصيد، ممكن تبقى تتصلي انتي؟

هو كده من اولها، يالهويييي،،،،

- حاضر، مفيش مشكله!!!

و بعد نص ساعه

- الو، انا ...............
- ايوه، اهلا اهلا،، بصي بقى، باقولك ايه، ما بلاش موضوع الكلام ده على التليفون وخلينا نشوف بعض ونتكلم احسن!! ايه رأيك؟
- طيب، اديني فرصه استأذنهم في البيت واشوف المفروض اعمل ايه..
- طيب، بصي، كلميهم، وشوفي، هو انتي فين دلوقتي؟
- في المعادي..
- لو قريبه من المترو، حطي نفسك في المترو وتعالي، أنا في مدينة نصر.... انزلي من المترو وخدي تاكسي!!! ولااقولك، امشي حبه، ممكن تخسي شويه، وادينا وقتها نكتب الكتاب ونعمل الفرح مره واحده مش لسه هانستنى لما تخسي!!!

يانهار مطين بطين،،، هو انا اللي هاخد بعضي واروح عنده في مدينة نصر!!! وكمان تريقه... وقله ادب............ما علينا لما نشوف اخرتها....

و بعد ربع ساعه تاني

- اخويا الكبير وافق نقعد شويه ونتكلم مع بعض،،، ممكن تتفضل في المعادي عندي هنا مكان ما انا قاعده وتقول اللي انت عايزه!!! انا مش هاقدر امشي لغايه مدينة نصر!!! كده هاوصللك بعد بكره!!!!
- ايه ده، مش انتي قلتي هاتيجي ؟
- لا معلش،،، انا اصلا مش باشوف حد لوحدي، وبما ان مفيش حد فاضي يكون معايا دلوقتي علشان اشوفك، وبما اني كده او كده بره البيت ممكن تيجي مكان ما انا موجوده نتكلم شويه...
- ايه ده، يعني بتطبقي نظريه "اللي عايزني يجيني انا ماباروحش لحد"؟ ايه ده بقى،،؟؟
- ايوه، حاجه زي كده،، مش انت العريس، اللي المفروض ييجي يشوف العروسه؟ يبقى انت اللي تيجي
- وبعدين يا فندم انت الراجل، اللي المفروض يتعب علشان يوصل للست،، ولا ايه؟ يعني جاملني، ولو في اول مره نتعامل فيها مع بعض!!!
- ايه ده، بس ماتقوليش كلمه راجل دي، ايه العقد دي؟ ده انا كنت فاكرك جدعه وبسيطه ومش بتاعه الأفكار المعقده دي!!!! بصي، انا والله عندي شغل لازم افضل قريب منه ناحيه منطقة المطار!!! ولازم انتي تقدري ظروفي، والله دي الحقيقه، علشان خاطري تعالي على نفسك شويه وتعالي!
- باقولك ايه، تعرف ا"لان لو نوتر" اللي في الميرغني،،، انا مش باعرف اروح غير هناك!!!!!!!!!؟؟؟
- ايه الأسامي المكعبله دي؟ ما علينا،، المرغني ايه بس؟ طيب ما انتي اللي يجيبك لغايه الميرغني يخليكي توصلي لغايه مدينة نصر ،، ايه العقد دي بقى؟!!!!

اتغظت، وقررت انهي الموضوع لغايه كده،،،، أنا اللي عندي مراره واحده ومش ناقصه كمان أعيش من غيرها!!!!!

- باقولك ايه، ما ايه رأيك آجي تحت بيتكم ونقعد نتكلم قدام البيت على دكه البواب، ده حتى يبقى احسن لك واوفر لك،،
- والله فكره،، حتى بالمره تطلعي عندنا، تكلمي ماما وتشوفي كمان هاتجيبي لي شبكه شكلها ايه!!!
ظريف،،،،،،،،،، والله العظيم ظريف،،،
- ماهو اللي بيحصل تقريبا هو كده،،،بص، عشر دقائق واكلمك تاني...
- بس انتي وافقتي و هاتيجي، صح؟؟

قررت اني مش هاشوفه لوحدي مهما حصل،، ده شكله مش مظبوط خالص،، ايه النيله دي!!

- الو،،، بص، انا قررت حاجه، انا هاجي لمكان قريب منك بس هاجيب طنط "خالتو "معايا اهي دلوقتي بدل امي....
- ايه ده، مش انتي قلتي هاتيجي لوحدك؟ على العموم ده حقك،،، براحتك..
- طيب بص، خلي الموضوع ده بكره،،، علشان هي مش فاضيه النهارده..
- يووووووووووه، مش انتي قلتي اصلا هاتيجي لوحدك،،، ايه لزمه انك تستني طنط وعمو !!! هو انا هاخطفك ولا هاعمل فيكي ايه يعني؟؟ وبعدين بكره ممكن اكون مسافر في شغل بره القاهره...
- معلش، خليني براحتي،،، بكره ان شاء الله ابقى كلمني قوللي هاتكون في القاهره ولا مسافر..

الساعه 5 العصر تاني يوم،،، ميسد كول!!!!!!! طبعا قررت اطنش،،، والله ما هارد عليه!!! كفايه المكالمات بتاعه امبارح..
اتصل تاني بعد ربع ساعه...طبعا رديت بسرعه البرق قبل ما يقفل ويعتبر ان الرنتين عباره عن مكالمه وانا اللي ماردش عليها....

- الو، ازيك،، انا ما سافرتش النهارده على فكره،،، هاه، هانشوف بعض امتى بقى وفين؟
- لا معلش، اسفه خالص،، بص، انا فكرت وقررت اني مفيش حاجه اسمها اني اجي ناحيه بيتكم،،، انت اللي تتفضل تيجي،، وانا واخويا هانكون في استقبالك في اي مكان في المعادي،،،،، تشرف وتأنس..
ايه ده، انتي وعدتيني،،،، ايه العقد دي!!! على فكره انتي مش بسيطه خالص ولا بتعرفي تقدمي تنازلات!!!وكمان بترجعي في كلمتك!!!! انتي ايه بس اللي حصلك ، مش دي .......... اللي كلمتها امبارح!! ايه اللي غيرك كده؟؟

طبعا عند هذا الحد، بدأت كل علامات التعجب تترسم على وشي.....يا وقعه زي بعضها،، ده اهبل باين عليه!!! هو انا اعرفه قبل كده علشان يحس اني اتغيرت ولا اتنيلت!!

- باقول لحضرتك ايه، مش معنى اني كبرت ووصلت للسن ده ومش متجوزه اني اقدم تنازلات من اولها،،، انا مش محتاجه راجل في حياتي غير علشان يهتم بيا ويتعب علشاني ويشيل همي!!!!وبعدين انت بتقولي اجي لغايه عندك، وبالليل، فكرت هارجع ازاي تاني في عز الليل؟ فكرت هاركب تاكسي وانا مش عندي عربيه وانت اللي عندك عربيه مش هاتتحرك من مكانك علشان توصللي؟ انت فكرت في راحتك انت بس!!!
- بصي،، بلاش الكلام الكبير ده،،،كبرتي ايه وبتاع ايه ،،، وبعدين انتي كده بتظلميني،،، كده بتحكمي عليا بحاجات مش فيا خالص!!!!!!!!! انتي صدمتيني فيكي!!!! انتي قلتي كلام دلوقتي جرحني خالص، وزعلني!!!
- معلش، مش قصدي، بس انا قصدي اقولك ان اخر منشور وصلني عن الرجاله بيقول ان في الحاله دي الراجل بيتحايل على الست (العروسه يعني) علشان يريحها ويروح مكان ما هي عايزه وفي المكان اللي هي تختاره وترتاح للمقابله فيه! مش بيفاصل في الموضوع ويحاول يخليها هي اللي تروح اقرب مكان يناسبه!!!!
- طيب يا ستي،،، انا من ايدك دي لإيدك دي،، شوفي انتي عايزه ايه وانا اعمله علشانك!!!! انا تحت امرك، بس لما اجي ناحيتكم تحتفلي بيا وتكرميني اخر كرم،،، عايز غدوه حلوه كده، جوزين حمام وخلافه، واهو كله علشانك في الأخر!!!

ايه الكلام السخيف ده؟!! هي بقت كده كمان!!!! ملامحي كلها اصبحت عباره عن علامة تعجب كبيره واتغير مكان حواجبي واتنقلوا مسافه خمسة سنتي فوق مكانهم الطبيعي،......... هو فعلا اهبل، صحيح، مفيش غير كده،، هو اهبل؟؟ ايه المصيبة اللي وقعت على دماغي دي!!!!

- شكرا على ذوقك،،، وربنا يقدرنا نكرمك اخر كرم!!!!.
- طيب بصي،،، هاجي لك المعادي زي ما انتي عايزه،،،،بس، في......................ن الو......... الو.................. ....ن..........تيت، تيت، تيت، تيت.......

الخط قطع،،،،،،،،، ومن اسبوع لا حس ولا خبر!!!!!!!!!!! يا حرااااااااااااام، اكيد مش قادر يجيب كارت شحن جديد!!!!!!!!!!!
مطلوب من اهل الخير، كارت شحن للعريس الأمور علشان يعرف يكلم اي عروسه تانيه ويتأهل بقى.....
وياريت لو علشاني انا دكتور تخصص اعصاب وحواجب ، يمكن يعرف ينزل حواجبي تاني لمكانها الطبيعي!!!

إنتحــــــار

طول عمرها عايشه معايا،،، تعيط لما اضحك، وتضحك من قلبها لما اعيط.
احلم واطلع للسما بأحلامي وهي توسوس في عقلي وقلبي بكلمه "ماتقدريش" مش هاترتاح ابدا غير لما انزل بكل احلامي لسابع ارض. وادفنها هناك وارجع ورايا الف ديل من ديول الخيبه.
افكر واوصل بفكري لأخر مدى، وهي تسرق افكاري... تسرقها بس علشان تخفيها، وليه تخفيها، دي هي بتحب تجيب من الأخر، هاتمحي معالمها، وفي اقرب بلاعه مجاري تغرقها...
اقرر، واول ما ابدأ التنفيذ تمنعني... تحبسني، وساعات كتير تجلدني،،،
هي شايفاني ولا حاجه،،، اكبر "ولا حاجه" في الدنيا... مهما عملت، انا برضه ولا حاجه،،، انا كرهت الـ"ولا حاجه" علشان بتفكرني بيها!!
حبيت، وهي كرهت،،، تعبت وهي ارتاحت،، اكلت وانا اللي تخنت،، اهملت مظهرها وانا اللي اتبهدلت، فرطت في صحتها وانا اللي مرضت.... استمتعت هي وانا اتدمرت......... دماري كان اكبر انتصار ليها..........فعلا مبروك عليها...
بعدتني كتير عن اهلي،، وعن كل اللي باحبهم،،، ازاي الاقي ايد تتمد لي، وتسيبهم هي ينفذوني ويبعدوني عنها!!! ابدا، مش هاتسمح لي ابدا ابعد عنها،،، ده انا ليها ومنها وعايشه علشانها..
حتى لما حبيت الموسيقى، والأدب والسفر وحلمت بالصحرا والبحر والخروج للدنيا الواسعه.... وهي حبت النوم والكسل والاكل والأنتخه قفلت عليا الباب، وسدت الشباك !! البحر اصبح رمز للكأبه، ,الصحرا اصبحت مجرد شويه رمل بيزحم المكان ويكسر الضوضاء بملل الهدوء..

فكرت اكلمها، انصحها وافهمها،،، لكن ولا بتسمع ولا بتفهم...... قررت اموتها.... لكن للأسف، قالوا لي ده هاييبقى اسمه انتحـــــــــــــــــــــــــــــــــــــــــــــــــــار!!

خازوأبل

باالعرببة الفصحى هو "خازوقابل" وبالإنجليزية السليمة "khazoable"
وهو تعبير جديد لسه نازل السوق دلوقتي حالا..التعبير ده ورد على ذهنى عندما كانت صديقتي تتكلم معي عن كميه الخوازيق التي تتعرض لها على مدار حياتها سواء في الشغل ولا في اي مكان تتعامل فيه مع الناس ...و بالرغم من صغير سنها فهي تشتكي من كمية لا بأس بها من اشكال وانواع الخوازيق التي تلاحقها اينما حلت وذهبت....
مش عارفه ليه ما استغربتش من كلامها، ورديت عليها بكل بساطه اننا كلنا على هذا الحال، وان الشعب المصري كله اتعود على كده خلاص، واصبح ده الطبيعي بتاعه،،
الفكره ان الإنسان المصري المعاصر اصبح يولد ومولود معه الخازوق بتاعه،، وتتراوح ظروف الخازوق حسب ظروف حياه كل انسان، وحسب ظروف اهله في الأصل.. فلو ابن عليه القوم هايكون الخازوق بسيط وغير مؤثر على الإطلاق، لكن لو كان من ابناء العامه والدهماء فهايكون الخازوق ذو اثر واضح عليه في كل خطوه من خطوات حياته.
وبعد فتره،وبعد ظهور طفرات كتير على الإنسان المصري، بدأ يظهر مصريين مولودين بدون الخازوق،، لكن الفكره ان التفكير العلمي المتطور لعب دور هام وخطير في تطوير تلك الإنسان اللي مولود ياحرام بدون خازوق، ووصل بعد طول تفكير وسنوات عديده من التجارب العلمية الى تحديث تلك الإنسان عديم الخازوق وتطويره لكي يكون انسان "خازوقابل" " "khazoableاي قابل للتعديل لكي يكون مثله مثل المصريين الأخرين لكي لايشعر بالنقص وسط اصحابه وزمايله...
فعلا، شكرا للعلم المصري الحديث...

الكومبارس

على فكره، فكرت قبل كده في انك البطل الوحيد لقصه حياتك،، وان القصه دي لما بقت فيلم، انت برضه البطل، وصاحب كل الماستر سينز اللي في الفيلم ده...،، انت كمان اللي الكاميرا بتدور علشانك ومتسلطه عليك طول الوقت، انت كمان من مكانك كبطل انت اللي بتحرك الشخصيات الفرعيه في الفيلم، وانت اللي بتحدد وبتختار الشخصيات التانيه في الفيلم، وكمان بتختار الكومبارس!طول ما انت بتلمع ادام الكاميرات، طول ما انت مندمج في الدور، طول ما انت حاسس الشخصيه، الفيلم ناجح ناجح!! لكن يوم ما تسيب مكانك كبطل، وتسيب الكومبارس يغطوا على دورك، يبقى ساعتها الفيلم كله للأسف سقط ..